ومهما يفُوت العُمر

ومهما يفُوت العُمر عَـ الماشي

ومهما جَنِيت مِـ الظُّلم فُوق راسي

هكُون ويَّاك أنا اقوى

وبِيك الأنا تِكمَل وتِستَقوى

على كُل جرح ومُر ..

على كُل حَنين بيتقابل فِـ احزانّنَا

ويجي الفَرح ينسِّيه الهَم ولو لحظة

وفَجأة يمُر !

هكُون اقوى عشان أنا مِن غِيرَك ولا حاجة !

ومهما أنا قُلت أنا أقدر !

فبردو لازم أكُون ويَّاك ..

عشان تِسندني فِـ الحاجة !

عاوز تعرف ليه أنا اختارتَك ؟!

طب عارِف ليه ما جاوبتَكش !

عشان ما ينفعَش تختار قدرك ..

وقُولة لأ لِيه ما تِتقالش !

بيجي عليَّا وقت واخاف انسى يُوم حُبَّك !

وأتُوه أنا وِسط أحزانِي ..

وغُربة تاخُدنِي وتجيبنِي

فأَسأَل امتى أنا حبِّيتَك ومِن تانِي ؟!

فَبِيْرُد الحَنيِن جُوَّايّ

واتلَملِم واقُول ازَّاي !

أخاف إنِّي انسى يُوم حُبَّك ..

ده إنت النُّور .. وإنت الصِّدق !

ده فِيك الرُّوح اللى اتساوِت ما بِين اتنِين

ومال القلب للتَّانِي ولا صدَّك ♥

ليه بِنخاف مِن الدُّنيا ونتهرَّب ..

مِن الأحلام !

ما حُبَّك كان فِـ يُوم حِلمِي

ولا اتدَّارَى مِن الخُوف واصبح فِـ يُوم مِن الأيَّام !

خيال مَلمُوس وبِيقرَّب !

فَما تقلقش مِن بُكرة ! ولا أنا كمان هَقلَق

مِسيـر الحُب فِينا يثُور

ويوصَل بِينا لأرقَى خيال

ولَو فِـ بحُور ..

وبنُور وبرِضَا الرَّحْمَن هَيِتحَقّق

♥ إن شاء الله ♥